Ama izateak zer esan nahi duen galdegiten hasi nintzaion neure buruari haurdun nengoela jakin orduko. Eta haren atzetik etorri zen galdera-sorta ez da gaur-gaurkoz oraindik gelditu. Emakumea noiz amatzen den itaunka jardun izan dut sarritan. Baita amatzeak balizko esanahi unibertsala ote zuen beldurrez igaro ere erditu aurretiko zein ondorengo hilabete luze asko. Ama bihurtzeak homogeneizatzen omen zaitu, eta horren ikarak eragindako aseezintasunak sortutako liburua da hau. Lehen begiratuan amagai batek bere baitara bilduta bizitako hausnarketaren emaitza dirudien honek, egungo gizarteak ama den edo izango den emakumearengan duen eragina azaleratzen du, betiere gogoetak egiazkoak baina ez nahitaez egia absolutua direla nabarmenduz.

Maite López Las Heras (Azkoitia, 1985), Filologia Klasikoan lizentziaduna, irakaskuntza du ogibide. Poeta eta itzultzaile gisa bi lan kaleratu ditu: 2018an bere lehen poesia liburua argitaratu zuen, gaztelaniaz, Pienso, luego escribo; 2020an, berriz, Safo, poesia guztia eman zuen argitara. Azken horrekin, euskarara ekarri ditu estreinakoz mendebaldeko lehenengo emakume poetak duela bi mila eta zazpiehun urte inguru ondutako poemak, zuzenean grekotik itzuliak. Bestalde, Maxixatzen eta Elinberri aldizkarietan kolaborazioak idazten ditu.